Сынапкөзелер
Ақшыл-сұр түсті, қыштан жасалған бұл ыдыстардың пішіні жарты шар мен конустың қосындысына ұқсайды. Кей үлгілері балық тәріздес болып, түбі сүйір әрі созылыңқы етіп жасалған. Барлық ыдыстардың өлшемдері бір-біріне шамалас, бүйірі домалақ, ал түбі сүйір болғандықтан, оларды кез келген жерге тік қою мүмкін емес. Сырты саусақпен басылған іздермен, жолақтармен және өрнектермен безендірілген. Безендіруде қалыптама, жапсырма, қырнау және оймыш сияқты әдістер қолданылған. Ауыз тесігінің өте тар болуы – олардың сұйықтық құюға арналғанын көрсетеді. Бұл ыдыстар негізінен сұйық дәрі-дәрмек, иіссу, сынап секілді заттарды сақтау үшін пайдаланылған. Барлығы қыш шеңберінде жасалып, жоғары температурада күйдірілген, бұл олардың беріктігі мен ұзақ сақталуын қамтамасыз еткен.
Көне ескерткіштерді 360° форматында үйден шықпай тамашалаңыз
