Су құбырлары
Тараз қаласында жүргізілген археологиялық қазбалар ежелгі қалада дамыған су тарту және кәріз жүйесі болғанын дәлелдейді. Қыш құбырлар тар және кең ұштарының біріктірілуі арқылы жалғанып, судың үздіксіз ағуын қамтамасыз еткен. Құбырлар сары және қызыл саздан дайындалып, жартылай қолөнерлік әдіспен өндірілген. Су жүйесі кей жерлерде жабық құбырлармен, кей бөліктерінде ашық каналдармен жүргізілген. Бұл деректер тараздықтардың ерте орта ғасырларда-ақ қала санитариясы мен инфрақұрылымына ерекше мән бергенін көрсетеді. Ежелгі су жүйесі – ата-бабаларымыздың инженерлік ойлау деңгейі мен құрылыс мәдениетінің жоғары дамығанының айғағы.
Хумша – көне сақтауға арналған ыдыс
Хумша – астық, су, май және шарап сияқты өнімдерді сақтауға арналған ірі қыш ыдыс. Атауы иран тілінен аударғанда «үлкен балшық құмыра» дегенді білдіреді. Құмыралар күйдіру алдында кептіріліп, арнайы пештерде дайындалған. Кейбір хумдардың түбінде ауа айналымын қамтамасыз ететін тесіктер болған – бұл астықтың көгеруінен сақтауға мүмкіндік берген. Хумшалар ерте және кейінгі орта ғасырларға жатады. Олар ангобпен жабылып, тамшы түрінде бояумен және спираль, зигзаг өрнектерімен безендірілген. Бұл өрнектер береке мен молшылықтың, сондай-ақ шебердің таңбасы немесе қорғаныш нышанының белгісі болуы мүмкін. Бүгінгі таңда табылған хумшалар – Тараз өңірінің мәдени және тарихи мұрасы, ата-бабамыздың тұрмыс-тіршілігі мен қолөнерін айғақтайтын құнды жәдігерлер.
Көне ескерткіштерді 360° форматында үйден шықпай тамашалаңыз
